សម្តេច ហ៊ុន សែនសម្រក់ទឹកភ្នែក ក្នុងពិធីបុណ្យសពព្រឹទ្ធបុរស សាយ ភូថង

ថ្ងៃទី ១៨ មិថុនា ឆ្នាំ ២០១៦ នេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានធ្វើដំណើរតាមយន្តហោះហេលីកុបទ័រ ទៅចុះនៅតំបន់ព្រំដែនជាប់ភូមិហាតលេក ស្រុកក្លងយ៉ៃ ខេត្តត្រាត ដើម្បីចូលរួមក្នុងពិធីបុណ្យសពឯកឧត្តម សាយ ភូថង ឥស្សរជនជាន់ខ្ពស់ ដែលមានកិត្តិយសដ៏ថ្លៃថ្លាក្នុងការបម្រើជាតិ មាតុភូមិ និង ប្រជាជន ។

អមដំណើរគណៈប្រតិភូ រួមមានមន្ត្រីជាន់ខ្ពស់របស់រាជរដ្ឋាភិបាល មានជាអាទិ៍ ឯកឧត្តមឧបនាយករដ្ឋមន្ត្រី ហោ ណាំហុង, លោកជំទាវឧបនាយករដ្ឋមន្ត្រី ម៉ែន សំអន និង មន្ត្រីយោធាជាន់ខ្ពស់ផងដែរ ។ ក្នុងឱកាសដ៏សែនក្តុកក្តួលមហាសោកសង្រេងនេះ សម្តេចនាយករដ្ឋមន្ត្រី ហ៊ុន សែន បានបង្ហូរទឹកភ្នែក រួមអាឡោះអាល័យដែលបាត់បង់អ្នកតស៊ូដ៏មានគុណបំណាច់ចំពោះជាតិ និង ប្រជាជន ។

ឯកឧត្តម សាយ ភូថង ជន្មាយុ ៩៦ ឆ្នាំ កើតនៅខេត្តកោះកុង បានតស៊ូរំដោះប្រទេស និង ប្រជាជនកម្ពុជា រហូតបានទទួលជ័យជម្នះដ៏ធំធេង ៕